2009ஆம் ஆண்டு, 6 முதல் 14 வயது வரையிலான அனைத்துக் குழந்தைகளுக்கும் கல்வி உரிமையை வழங்கும் முக்கியச் சட்டத்தை இந்தியா நிறைவேற்றியது. திரு. ஈசுவரன் உள்ளிட்ட பல தேசியக் கல்வித் தலைவர்களின் நீண்டகால முயற்சிகளான தேசியப் பேரணிகள், விழிப்புணர்வு நிகழ்ச்சிகள், களப்பணிகள், கல்வி ஆய்வுகள்- மற்றும் அரசுப் பேச்சுவார்த்தைகள் இதற்கு முக்கிய வழிவகுத்தன. இந்தச் சட்ட இயற்றும் இந்தியாவின் வளர்ச்சிக்கும் சமூக மாற்றத்திற்கும் முக்கியமான காரணியாக உலகக் கல்வித் தலைவர்கள் கருதினர். குழந்தைத் தொழிலாளர் முறையை ஒழிக்க உதவுவதுடன், அதிகமான இளம் மக்களைக் கொண்ட இந்தியாவில் அனைத்துக் குழந்தைகளுக்கும் கல்வி வாய்ப்புக்களை அளிக்கும் வரப்பிரசாதமாக அமைந்தது என்பது உறுதி. உலக அரங்குகளில் கல்வி தொடர்பாக இந்தியா ஏற்றுக்கொண்ட உறுதிமொழிகளையும் ஒப்பந்தங்களையும் திரு. ஈசுவரன் எப்பொழுதும் ஆசிரியர் சங்கங்களின் கூட்டுப் பணியாகவே கருதினார். ஆதலால் இந்தியாவின் பெரும் எண்ணிக்கையிலான தொடக்கப்பள்ளி ஆசிரியர்களை இந்த உலகளாவிய நோக்கத்திற்காக ஒருங்கிணைத்தார். இன்று உலகின் பல நாடுகள் நிலையான வளர்ச்சி இலக்குகளை (SDGs) அடையத் தங்கள் திட்டங்களை மாற்றி அமைத்து வருகின்றன. “தரமான கல்வியும் வாழ்நாள் முழுவதும் கற்றலும்” என்ற SDG4 நோக்கத்துடன் இணைந்த கல்விக் கனவு, திரு. ஈசுவரனின் வாழ்நாள் செய்தியாக இருந்தது. கல்விக்கான உலகளாவிய இலக்குகள் முன்வைக்கப்பட்ட காலத்திலிருந்தே, இந்தியாவில் இதற்கான பொது ஒப்புதலை உருவாக்க அவர் இடைவிடா முயற்சிகளை இந்திய ஆசிரிய இயங்களின் மூலம் ஊக்குவித்தார். மக்களின் தேவைகளையும் சூழலையும் மதிக்கும் தரமான இலவசக் கல்வி, ஆசிரியர்களும் மாணவர்களுக்குமான வாழ்நாள் தொடர்கல்வி வாய்ப்புகள் கட்டாய அவசியமென நம்பினார். அதிகரிக்கும் சவால்களுக்கு இடையே, தன்னிறைவும், அனைவரையும் உள்ளடக்கிய தனிமனித மற்றும் சமுதாய வளர்ச்சியையும் ஆரம்பக்கல்வி வாயிலாக உருவாக்குவதை தன் வாழ்நாள் இலட்சியமாகவே கொண்டிருந்தார்.